Përleshje të dhunshme shpërthyen të mërkurën për të dytën ditë radhazi mes protestuesve antiqeveritarë dhe mbështetësve të qeverisë serbe, në një përshkallëzim të madh pas më shumë se nëntë muajsh protestash të vazhdueshme kundër presidentit Aleksandar Vuçiç.
Incidenti më i rëndë ndodhi në qytetin verior të Novi Sadit, ku mbështetës të presidentit hodhën vazhdimisht fishekzjarrë dhe mjete piroteknike ndaj protestuesve, pranë zyrave të Partisë Progresive Serbe (SNS) – partia në pushtet.
Në përplasje, protestuesit reaguan duke thyer dritaret e godinës së partisë. Policia speciale ndërhyri duke formuar kordone sigurie, por tensionet vetëm u rritën.
Protestuesit reaguan duke thyer dritaret e zyrave të partisë, ndërsa policia e trazirave u vendos jashtë për të mbrojtur ndërtesën.
Tensionet nuk u kufizuan vetëm në Novi Sad. Mijëra protestues u mblodhën edhe në pjesë të tjera të vendit.
Në Beograd, kryeqyteti i Serbisë, policia përdori gaz lotsjellës për të shpërndarë turmat e protestuesve në një pjesë të qytetit. Në qytetin qendror të Kraljevës, policia u detyrua të ndërhyjë për të ndarë dy kampe kundërshtare, ndërsa protesta u zhvilluan edhe në Kragujevc, Çaçak dhe Nish. Nuk është konfirmuar zyrtarisht nëse ka të lënduar në qytetet e tjera përveç Novi Sadit.
Ndërkohë në Beograd, presidenti i Serbisë Aleksandar Vuçiç iu drejtua qytetarëve të mbledhur në rrugën Kneza Miloša, ku mori mbështetje nga përkrahësit e tij që e pritën me brohoritjet “Aco, serb!”.
Në fjalimin e tij, presidenti Vuçiç deklaroi se situata në Novi Sad ishte e rëndë dhe se kishte shumë qytetarë të plagosur. Ai tha:
“Lajme të këqija vijnë nga Novi Sadi. Ata sulmuan brutalisht ambientet e SNS-së. Ka shumë qytetarë të plagosur, këta janë njerëz që po ruanin shtëpinë e tyre. Policia nuk është askund. Disa morën pushim mjekësor sepse e dinin çfarë po ndodhte. Por jam i sigurt se djemtë tanë të guximshëm do ta shpëtojnë shtëpinë e tyre”.
Vuçiç deklaroi se nuk do të ftojë në përplasje, por kërkoi që të respektohen edhe ata që kanë pikëpamje të ndryshme. Ai kritikoi ashpër televizionet N1 dhe Nova S, duke thënë se përhapin një “fushatë të ndyrë”. Ai u shpreh:
“Nuk na pëlqejnë, por duhet t’i kuptojmë. Sot dhe sonte, Serbia u ngrit si kurrë më parë. Në gjithë Serbinë mblodhën jo më shumë se 4,000 njerëz, ndërsa ne kishim mijëra që nuk sulmojnë askënd dhe duan vetëm të jetojnë normalisht”.
Duke folur për përmasat e protestave, presidenti shtoi:
Në Beograd ishin rreth 3,084 persona.
Në Novi Sad rreth 1,695 protestues.
Në Novi Sad u plagosën 64 qytetarë.
Janë plagosur 16 efektivë policie, dy prej tyre rëndë: një me nofull të thyer, një me dëmtim në gjoks.
Vuçiç i quajti protestat një “atentat i shumëfishtë”, duke pretenduar se protestuesit kishin vetëm qëllime për të sulmuar qytetarë të pafajshëm dhe theksoi se askush nga përkrahësit e tij nuk i kishte sulmuar të parët. Ai shtoi:
“Kudo që shkuan, protestuesit sulmuan njerëz që mendojnë ndryshe. Ne nuk kemi problem të dëgjojmë, të kuptojmë çfarë ndryshimesh duan, por nuk mund të flasim me ata që mendojnë se zgjidhja është dhuna dhe rrezikimi i jetës së të tjerëve.”
Presidenti përmendi se kishte tentuar të kontaktonte një nga prokurorët, por nuk kishte marrë përgjigje, duke sugjeruar me ironi se “ndoshta po luajnë në det ose po flenë”.
Në fund të fjalimit të tij, Vuçiç garantoi se nuk do të përdoret ushtria, nuk do të ketë luftë civile, por se “po marrim masa dhe po pastrojmë rrugët e Beogradit, së shpejti edhe të Novi Sadit dhe qyteteve të tjera.”
Protestat në Serbi kanë nisur që në nëntor 2024, të udhëhequra nga studentët, pasi një tendë e një stacioni treni u shemb në Novi Sad, duke shkaktuar vdekjen e 16 personave.
Ngjarja shkaktoi një valë zemërimi publik dhe akuzash për korrupsion në projektet shtetërore të infrastrukturës. Protestat, të organizuara nga lëvizja “Studentët në Bllokim”, janë përhapur në qytete të ndryshme si Beograd, Novi Sad, Nish, Kragujevc, Suboticë, Shabac dhe Leskovc.
Fillimisht të nisura si reagim ndaj dhunës ndaj qytetarëve, protestat sot kanë marrë dimensione politike, me akuzat kryesore të drejtuara ndaj qeverisë për mbrojtjen e huliganëve dhe mosgarantimin e sigurisë publike.
