Pas gati dy vjetësh të pushtimit të Shqipërisë, Benitto Mussolini (Duçe) shkel për herë të parë vendin tonë. Qëllimi i kësaj vizite të papritur dhe të mbajtur tepër sekret nuk ishte Shqipëria, por fronti i Luftës Italo-Greke ku punët po shkonin keq e më keq. Ardhja e tij e beftë ishte ngritja e moralit të rënë përtokë të trupave fashiste, të cilat po pësonin disfatë pas disfate me grekët.
Koleksionisti i njohur Rafet Kadriu ka publikuar disa foto të pazbuluara më parë, ku Musolini shfaqet duke kaluar lumin Vjosa. Ai duket duke ecur mbi një urë provizore, e ndërtuar me dërrasa të vendosura mbi disa varka.
Vizita ka qenë aq sekrete sa lajmi që Duçja kishte qenë në Shqipëri u bë i ditur vetëm më 10 maj 1941, rreth një muaj e gjysmë pasi ai ishte kthyer në Romë. Duçja qëndroi në Shqipëri 18 ditë duke vizituar gjithë vijën e frontit të luftimeve.
