Kryetari i Këshillit Kombëtar të Shqiptarëve në Preshevë, Jonuz Musliu, ka kërkuar që në Preshevë të hapet një zyrë monitoruese nga Kosova dhe Shqipëria.
“Kam kërkuar që në Preshevë të kemi një zyrë monitoruese nga Shqipëria dhe nga Kosova për të qenë në kontakt me situatën në Luginë. Ka biznese që kanë interes të investojnë në Luginën e Preshevës, por Shqipëria dhe Kosova duhet të angazhohen direkt në mënyrë urgjente,” tha Musliu gjatë një interviste për emisionin “Diplomaticus” në News24.
Teksa jep alarmin se shqiptarët nga Presheva po emigrojnë pasivisht, Musliu shprehet se interesimi i shtetit shqiptar do i shmangte ikjet masive.
“Kur Serbia ndan buxhet prej miliona dollarësh në vit për serbët e Kosovës, ne kemi dy shtete, Shqipërinë dhe Kosovën. Shqipëria me kushtetutë e ka detyrim që të interesohet për shqiptarët kudo që janë ata. Unë mendoj se kjo është mënyra për të shmangur emigrimet masive të të rinjve shqiptare nga Presheva. Serbia është e interesuar vetëm për territor, që ta marrin edhe atë pjesë në mënyrë të heshtur. Shqiptarët duhet të jenë të interesuar që t’i mbrojnë shqiptarët në Luginën e Preshevës sepse është vendi ynë”, thekson më tej Musliu.
