Celulari e rrjetet sociale janë kthyer tashmë në një ushqim të përditshëm, ku padiskutim, nuk mund të bëjmë pa to. Informacionet që na vijnë në kohë reale dhe përditësimi me atë se çfarë ndodh kudo në botë, na ka krijuar një lloj varësie. Shpesh, psikologë të ndryshëm kanë nxjerrë në pah se sa negativisht ndikon në shëndetin mendor, por duket se të rinjtë, në një masë më të gjerë, nuk e vrasin mendjen në këtë drejtim. Gjithsesi, ka edhe raste përjashtimore.
Simon Cowell ka hequr dorë përfundimisht nga përdorimi i celularit, dhe është shumë i lumtur për këtë vendim. Ai ka thënë se këtë vendim e ka marrë para 10 muajsh. Sipas tij, heqja e celularit i ka bërë mirë mendërisht.
“Është e vërtetë që kam 10 muaj që nuk përdor më celular. Ndryshimi i madh që pësova është se u bëra i vetëdijshëm për njerëzit që më rrethonin, dhe u fokusova tek ata.
Gjithashtu gjëja që më zemëron shumë është kur jemi ulur në një tavolinë, dhe të gjithë janë të fokusuar tek telefoni, gjë që me siguri e kam bërë edhe unë më parë. Heqja e celularit më ka bërë mirë mendërisht”, është shprehur producenti i njohur. Ai ka një djalë 4-vjeçar, dhe përdorimin e i-padit i vogli i Simon e ka tejet të kufizuar.
