Parlamenti i Kanadasë ka miratuar një ligj për legalizimin e lëndës narkotike. Në këtë formë, të gjithë ata që kanë dëshirë që të konsumojnë marijuanë, nuk do të ndiqen penalisht. Më konkretisht, kanadezët do të jenë në gjendje të blejnë dhe të konsumojnë legalisht kanabis, duke nisur nga fillimi i këtij shtatori.
Ligji në fjalë për kanabisin kaloi pengesën përfundimtare të martën, me një votim në senat me 52 vota pro dhe 29 kundër. Projektligji kontrollon dhe rregullon mënyrën se si mund të kultivohet, shpërndahet dhe shitet droga.
Kanadaja është vendi i dytë në mbarë botën që ka legalizuar përdorimin rekreativ të drogës.
Sa i takon kësaj çështje, një reagim ka patur edhe nga kryeministri Justin Trudeau, i cili ka shkruar në Twitter: “Deri tani, ka qenë shumë e lehtë për fëmijët tanë të marrin marijuanë – dhe për kriminelët që të korrin fitimet. Sot, ne e ndryshojmë këtë. Plani ynë për legalizimin dhe rregullimin e marijuanës, sapo ka kaluar në Senat”. Gjithsesi jo të gjithë kanë qënë pro këtij vendimi, pasi disa grupe politike konservatore kundërshtuan ligjin e ri.
