Një ditë para ndeshjes Shqipëri–Serbi, Pika Kufitare në Morinë është shndërruar në një vend festimi, ndërsa mijëra tifozë kuqezi nga Kosova dhe Lugina e Preshevës po hyjnë në Shqipëri për të përkrahur kombëtaren.
Të organizuar në grupe dhe të mbushur me entuziazëm, tifozët kanë krijuar një atmosferë elektrizuese në kufi, mes thirrjeve “Shqipëri etnike” dhe “Fitore Shqipëri”, duke kënduar këngë patriotike dhe duke valëvitur flamujt kuqezi.
“Kemi ardhur me zemër për kombëtaren. Sot jemi të gjithë bashkë. Shqipëria do fitojë!”, u shpreh një prej tifozëve në kufi.
Gjatë pasdites është rritur ndjeshëm fluksi i qytetarëve nga Kosova, disa për të ndjekur nga afër përballjen e rëndësishme në “Air Albania”, e të tjerë për të kaluar pushimet në bregdetin shqiptar. “Po shkoj në bregdet. Shpresoj të mos ketë provokime nga serbët. Unë parashikoj 2-1 për Shqipërinë”, tha një tjetër tifoz entuziast.
Mes kalimtarëve kishte edhe udhëtarë që nuk kishin ardhur për ndeshjen. Një qytetar nga Serbia tha: “Të dy ekipet janë të forta. Mendoj se do dalë barazim, 1-1”. Ndërkohë, një qytetar kroat që po udhëtonte drejt Shqipërisë shprehu bindjen se Shqipëria do të fitojë: “Ka lojtarë të mirë, mendoj se do fitojnë.”
Fluksi nga Kosova dhe vendet e rajonit drejt Shqipërisë mbetet i lartë, ndërsa shumë prej qytetarëve do ta ndjekin ndeshjen përmes ekraneve gjigante të vendosura në zona turistike dhe urbane.
