Mbrojtësi i Villarrealit, Ruben Semedo, është arrestuar nga Garda Civile e Valencias nën akuzat për plaçkitje të rëndë dhe se e ka mbajtur peng një person, raporton e përditshmja spanjolle “AS”.
Kjo është hera e dytë që përfaqësuesi i Kombëtares U-21 të Portugalisë arrestohet nga policia, pasi në janar të këtij viti ai u arrestua për shkak se e kishte kërcënuar një roje të një lokali nate me armë zjarri.
Siç bëhet rindërtimi i ngjarjes, hetimet janë hapur në sajë të një denoncimi të bërë në 12 shkurt nga një person që është paraqitur në komisariatin e Policisë Kombëtare Spanjolle me paterica, dhe me dëmtime të dukshme në trup. Viktima që në ballafaqim ka njohur Semedon dhe kushëririn e tij, ka treguar se është sekuestruar, lidhur dhe rrahur.
Një bashkëpunëtor i të akuzuarve ndërkohë ka qëlluar madje dhe disa herë me pistoletë për ta bindur viktimën që t’iu dorëzonte çelësat e shtëpisë dhe adresën e banesës së tij, që më pas është gjetur e boshatisur. Nëse shpallet fajtor për akuzat, 23-vjeçari mund të dënohet deri me dy vite burgim. Semedo ashtu akuzohet edhe për posedim të jashtëligjshëm të armës.
