Policia ka arrestuar dy persona në lidhje me pengmarrjen e 27-vjeçarit, disa ditë më parë. Të arrestuarat janë Monika Marku dhe Suate Çeloaliaj.
Dy vajzat akuzohen se kanë bashkëpunuar me njëra-tjetrën, për t’i marrë para 27-vjeçarit duke i hequr lirinë për disa orë dhe duke e dhunuar fizikisht atë, në ambientet e një apartamenti. Policia ka shpallur në kërkim edhe një person tjetër, i cili dyshohet se ka bashkëpunuar me dy të arrestuarat.
Njoftim:
Tiranë/Vijon operacioni policor i koduar “Kufizimi”. Vihen në pranga 2 shtetase të shpallura në kërkim 3 ditë më parë, në kuadër të këtij operacioni. Në vijim të operacionit policor të koduar “Kufizimi”, i zhvilluar 3 ditë më parë nga Sektori për Hetimin e Krimeve të Rënda, në bashkëpunim me Forcën e Posaçme Operacionale, si rezultat i të cilit u vunë në pranga 3 shtetas, janë kryer kontrolle për kapjen e shtetasve të shpallur në kërkim.
Si rezultat, u vunë në pranga shtetaset M. M., 21 vjeçe dhe S. C., 25 vjeçe. Nga hetimet dyshohet se këto 2 shtetase, 2 shtetasit e arrestuar gjatë operacionit dhe shtetasi në kërkim K. N., kanë bashkëpunuar me njëri-tjetrin, për t’i marrë para, 27-vjeçarit, duke i hequr lirinë, për disa orë, dhe duke e dhunuar fizikisht atë, në ambientet e një apartamenti. Punohet për kapjen e shtetasit K. N. Materialet proceduriale do t’i kalojnë Prokurosisë, për veprime të mëtejshme.
