Ish-presidenti i Interit, Massimo Moratti, ka sqaruar se përse ai vendosi që të mos pranonte propozimin e bërë nga Andrea Agnelli për të marrë drejtimin e Federatës Italiane të Futbollit (FIGC). Moratti është shprehur se ai ka respekt për presidentin e Juventusit dhe se duhet harruar “Calciopoli” i famshëm, pasi ai është një njollë për futbollin italian.
“Kisha mbështetjen e Juventusit dhe e falënderoj presidentin Agnelli për nismën që mori, duke më propozuar mua. Me të kam një marrëdhënie shumë të mirë.
Por nuk më dukej e drejtë që të nisja këtë rrugëtim në këtë moment, ndërkohë që persona të tjerë kishin muaj që kishin nisur punën me kandidaturën e tyre, duke mbledhur edhe votat, siç është rasti i Gravina. Kjo lëvizje besoj se fshin pasojat që pati skandali i “Calciopoli”. Ajo është një njollë e futbollit tonë, por personalisht nuk kam asnjë inat karshi Agnelli”, tha Moratti.
Duke folur për Interin e këtij sezoni, që vuan dhe shpesh arrin të fitojë me përmbysje apo në sekondat e fundit, ish-presidenti Moratti thotë: “Ndeshja ndaj Tottenham ishte momenti i kthesës dhe duket se Interi ka gjetur ekuilibrat e qetësinë. Është një ekip që ka karakter, që synon gjithnjë maksimumin dhe mund të shkojë shumë larg”.
