Mesut Ozil nuk është duke kaluar formën më të mirë në Premier League te klubi i Arsenal. Ai është një ndër lojtarët më të paguar në Angli, por forma që ka treguar nuk ka qenë asnjëherë në lartësinë e sezonit që lamë pas.
Mesfushori gjerman ka marrë një propozim të bujshëm nga vendlindja e prindërve të tij, Turqia. Goksel Gumusdag presidenti i klubit të Superligës turke Istanbul Basaksehir, është i gatshëm të bëjë një sforcim të madh ekonomik për të marrë yllin e Arsenalit.
“Ozil është një futbollist lojtar i çmuar. Shpresoj që një ditë rrugët tona të kryqëzohen. Nëse ai dëshiron të bashkohet me ne, do të bëjmë gjithçka për ta marrë”, ka deklaruar Gumusdag për Sport Bild.
Ozil merr në Angli 350 mijë sterlina në javë dhe natyrisht bëhet fjalë për një shifër që pak klube në botë mund ta përballojnë.
Megjithatë, Basaksehir kryeson kampionatin turk dhe drejtuesit e klubit kanë marrëdhënie të ngushta me presidentin turk Recep Tayyip Erdogan, i cili aludohet se ka pasur një rol të rëndësishëm në ngritjen e Basaksehir-it në nivele kaq të larta.
Para Kupës së Botës Erdogan u fotografua me Ozil, foto që shkaktuan polemika pa fund në Gjermani, duke çuar te largimi i Ozilit nga kombëtarja.
