Neymar ndodhet në Brazil duke u rikuperuar nga operacioni që bëri në kyçin e këmbës së djathtë. Ditën e sotme atë e ka vizituar një nga futbollistët më të talentuar brazilian, që pritet të debutojë vitin e ardhshëm tek Real Madrid. Vinicius Junior është investimi 45 milionësh i madreilenëve, i cili u ble tek Flamengo, ka vizituar yllin e PSG-së, i cili është mjaft i lidhur me një transferim të mundshëm tek “Los Blancos”.
AS shkruan se ata janë shokë të mirë dhe takohen vazhdimisht kur Neymari gjendet në atdhe. Kësaj radhe Vinicius me vete kishte marrë edhe vëllain e vogël, i cili postoi një foto në rrjetet sociale duke shkruar: “Idhulli im, Nymar Junior”.
Vinicius pritet të testohet në Madrid gjatë verës, për të parë nëse është gati për ekipin e parë, apo do të huazohet edhe për një sezon. Ai ishte në Spanjë në fund të vitit 2017, ku u takua edhe me Cristiano Ronaldon.
Vinicius Junior dhe Neymar Junior pritet të bëhen shokë edhe në fushë, pasi Florentino Perez nuk po lë gurë pa lëvizë për të pasur tek Reali që nga sezoni i ardhshëm Neymarin. Dëshira e numrit një të madrilenëve për të pasur 26 vjeçarin në “Santiago Bernabeu” është e vjetër, që në kohën kur ai luante në Brazil tek Santos.
