Xherdan Shaqiri dhe Granit Xhaka kanë marrë një gjobë nga FIFA ditën e sotme për shqiponjën që bënë me duar pasi shënuan ndaj Serbisë. Dy shqiptarët dhe kapiteni i Zvicrës janë dënuar me 25 mijë franga zvicerane në total. Disa shqiptarë nga SHBA-të kanë hapur një fushatë ku janë bashkuar edhe shumë të tjerë që të mbledhin para për të paguar këtë gjobë dhe në rast se nuk pranohen nga Federata atëherë do të shkojë për bamirësi.
LEXO EDHE : FIFA i dënoi, shqiptarët nga SHBA-të bëjnë gjestin e madh
Ministri i Tregtisë dhe Industrisë në Kosovë, Bajram Hasani ka vendosur që pagën e tij ta japë për të paguar një pjesë të gjobës së Granit Xhakës dhe Xherdan Shaqirit, të cilët u dënuan nga FIFA për shkak të gjestit të shqiponjës dykrenare në vazhdën e festimeve të golave të tyre që i dhanë fitoren 2-1 Zvicrës në përballjen me Serbinë.
Përmes një postimi në Facebook, ministri që edhe vet vjen nga Gjilani, vendlindja e Shaqirit, ka thënë se emocionet që ata u dhanë të gjithë shqiptarëve nuk paguhen me parà.
“Nuk paguhen me parà emocionet që na dhanë Granit Xhaka e Xherdan Shaqiri, kur festuan me shqiponjë, pas golave të tyre në ndeshjen Zvicër-Serbi. Ata u dënuan vetëm sepse nuk harruan rrënjët e tyre, nuk harruan nga vijnë. Jo se ata nuk i kanë mundësitë financiare për ta paguar një dënim të tillë, por ndjenja e krenarisë që na dhanë me golat e tyre, më bën të ndihem i detyruar që një pagë timen ta ndaj për pagesën e kësaj gjobe. Vazhdoni djema e na bëni krenarë!”, shkruan ministri Hasani në Facebook.
