Drejtori sportiv i Milanit, Massimiliano Mirabelli, ka konfirmuar se klubi ia ka ndërprerë kontratën Gabriel Palettas, me marrëveshje të dyanshme. Mbrojtësi është lidhur me disa klube turke, duke përfshirë Fenerbahcen, Galatasarayn dhe Antalyasporin, dhe pritet ta vazhdojë karrierën në Superligën turke.
Lojtari që mbush 32 vjet në muajin e ardhshëm ka pasur kontratë me Milanin deri në fund të sezonit, dhe ishte vendosur të mos i vazhdohej kontrata.
Klubi italian ka huazuar portierin Gabriel Vasconcelos Ferreira në Serie B te Empoli. Braziliani ka rënë në listën e përzgjedhjes, duke qenë se para tij ndodhen Gianluigi Donnarumma, Antonio Donnarumma dhe Marco Storari.
25-vjeçari do të qëndrojë te Empoli deri në fund të sezonit, mirëpo gjatë verës do të kthehet në San Siro dhe pritet të shihet se çfarë do të ndodhë me të ardhmen e tij.
Crotone e ka zyrtarizuar transferimin e mesfushorit të Milanit, Niccolo Zanellato, në formë huazimi deri në fund të sezonit, me obligim blerjeje, ndërsa Rossonerët do të përfitojnë 50 për qind nga shitja e ardhshme.
19-vjeçari rrjedh nga Akademia e Milanit dhe i është dhënë mundësia të luajë për ekipin e parë këtë edicion në Europa League. Për blerjen e Zanellatos në fund të sezonit, Crotone do të paguajë vetëm 300.000 euro.
