Milani ka dhënë provat se është duke u rikthyer në formë të mirë me Gattuson në pankinë. Pas fitore në kampionat, vjen edhe një triumf në Kupën e Italisë ku ka mposhtur me rezultatin e thellë 3-0 Veronën. Ndeshja u zhbllokua që në pjesën e parë ku për kuqezinjtë ka shënuar Suso dhe Romagnoli, për tu pasuar nga goli i Cutrone në pjesën e dytë. Fakt është se Milani ka zhvilluar një ndeshje mjaft të mirë dhe ka bindur në fushë.
Kjo fitore është mjaft e rëndësishme pasi një ditë më pas do të merret edhe vendimi i UEFA-s sa i përket “fare-play financiar”. Një ndeshje aspak e qetë ka qenë edhe për portierin Donnarummam, i cili është ofenduar nga tifozët për zërat që ai po kërkon largimin me çdo kusht nga ekipi.
Nga ana tjetër edhe Fiorentina ka triumfuar me rezultatin 3-2 ndaj Sampdorias dhe është kualifikuar për në çerekfinalet e Kupës së Italisë, ku do të përballet me skuadrën fituese të çiftit Lazio-Citadella. Skuadra e Piolit gjeti golin që në minutën e dytë me anë të sulmuesit Babacar, por Sampi barazoi me anë të mesfushorit Barreto, duke fiksuar shifrat 1-1 në pjesën e parë. Në pjesën e dytë u akorduan 3 penallti, 2 për Fiorentinën, të cilat u shndërruan në gola nga Veretout dhe 1 për Sampin, që u ekzekutua saktë nga Ramirez.
