Sulmuesi polak, Piatek është duke kaluar një formë fantastik në Serie A. Ai iu bashkua Genoas në fillim të sezonit dhe rezultoi si një ndër goditjet më të mira të merkatos së verës. Polaku është i papërmbajtshëm para portës, kjo ka bërë që Milani të kërkojë shërbimet e tij që tani në janar.
Largimi i Piatek nga Genoa duket se është i pashmangshëm, pasi për janë duke treguar interes disa skuadra të mëdha, për këtë arsye presidenti i kuqebluve, Enrico Preziosi është vënë në lëvizje për të gjetur pasardhësin. Drejtuesit e Genoas janë fokusuar te Mario Balotelli, i cili e ka mbyllur misionin e tij te Nice dhe është në pritje të një transferimi.
Sponsori kryesor i kësaj marrëveshjeje është vetë trajneri Cesare Prandelli, i cili ka stërvitur Balotellin edhe te Kombëtarja Italiane, kur vetë sulmuesi luajti një rol prej protagonisti në Botërorin e 2014-ës.
Aktualisht SuperMario është në pritje të akordit për t’u transferuar te skuadra e Marseilles, por asnjëherë nuk e ka mohuar dëshirën për t’u rikthyer në Itali, ndaj një telefonatë nga Genoa, do të ndryshonte tërësisht planet e tij.
Në orët në vijim, kur të jetë qartësuar më shumë situata me sulmuesin Piatek, presidenti Preziosi pritet të mbajë një takim edhe me menaxherin e Balotellti, Mino Raiola, për të diskutuar mbi mundësitë e veshjes kuqeblu të sulmuesit.
