Një letër e rrallë dhe e ndjerë nga bashkëshortja e kampionit të Formula 1, Michael Schumacher,është zbuluar së fundmi.
Corinna Schumacher, 49-vjeç, e përshkruan të shoqin si një “luftëtar që nuk dorëzohet kurrë”. Shtatë herë Kampioni i Botës në Formula One pësoi një plagë traumatike në tru, pasi pësoi një aksident gjatë pushimeve në vitin 2013. Që nga ajo kohë, kampioni ndodhet në gjendje kome, ndërsa informacionet nga familja e tij për gjendjen shëndetësore të kampionit, kanë qenë thuajse zero.
Në një letër emocionale, dërguar një muzikanti gjerman në një periudhe që nuk dihet, Corinna shkruante:
«Është mirë të marrësh kaq shumë urime të sjellshme dhe fjalë të tjera pozitive, gjë që është një mbështetje e madhe për familjen tonë. Ne të gjithë e dimë që Michael është një luftëtar dhe nuk do të dorëzohet».
Kjo është përgjigja e kthyer ndaj liderit të bandës së Hamburgut, Sascha Herchenbach që i kishte dërguar familjes së kampionit një këngë të regjistruar, të titulluar «Born To Fight» (Lindur për të luftuar).
Ai e kishte kompozuar këngën pak muaj pas aksidentit tragjik më 29 Dhjetor 2013. Herchenbach e zbuloi përmbajtjen e letrës gjatë një interviste me një revistë gjermane, javën e kaluar.
«Nuk e prisja një përgjigje. Letra ishte shkruar me shkrim dore nga Corinna e më pas firmosur nga vetë ajo», tregoi ndër të tjera lideri i bandës gjermane.
Besohet se 49-vjeçari po mbahet në shtëpinë e tij luksoze në Zvicër, ndërsa një ekip mjekësor kujdeset për të. Thuhet se kampioni merr një trajtim prej 115 mijë paund në javë, nga një skuadër që përbëhet nga 15 mjekë dhe infermierë./ Përshtati TIRANA TODAY
