Prej kohësh po flitet se mes ish-kryeministrit Sali Berisha dhe kreut të Partisë së Lirisë, Ilir Meta ka ndodhur një krisje. Gjithashtu, po thuhet se ajo që ka krisur raportet mes tyre është afrimi i Berishës me grupin e deputetëve të Gazment Bardhi.
Ndërkohë, një deklaratë e bërë së fundmi nga vetë Meta ka ngritur më tepër dyshime lidhur me koalicionin “Bashkë Fitojmë” dhe për raportin e tij me ish-kryeministrin. I ftuar në MCN, ish-presidenti është shprehur i gatshëm që të çojë para projektin e partisë së tij edhe i vetëm. Ndër të tjera ai theksoi se është i hapur për bashkëpunime, mirëpo vetëm me Partinë Demokratike të Kuvendit të 11 dhjetorit, ku Gazment Bardhi dhe deputetët që mbështesnin këtë të fundit asoj kohe nuk bëjnë pjesë.
“Koalicioni bëri përpjekjet e tij më të mira për kohën dhe rrethanat anormale dhe të sforcuara në të cilat u krijua. Përsa i takon të ardhmes, Partia e lirisë është e hapur për bashkëpunim me PD e 11 dhjetorit, me çdo forcë tjetër politike. Vlerëson çdo ristrukturim të forcave të tjera që ndihmon për të rritur efikasitetin opozitar. Sa i takon koalicionit për të ardhmen, jemi ende në kohë për të marrë vendimet e duhura dhe është detyra jonë që në çdo rast të përgatitemi sikur do të hyjmë vetëm.
Për ne themelore është çkapja e shtetit dhe rivendosja e demokracisë dhe kjo mund të ndodhë vetëm përmes fuqizimit të opozitës”, ka thënë Meta, duke ripërsëritur më tej gabimet e opozitës që sipas tij e kthyen atë për një kohë të gjatë në një zgjatim të maxhorancës.
“Problemi i parë i opozitës është se ajo ka qenë për një kohë të gjatë nën drejtimin e Edi Ramës. Të gjitha vendimet që janë marrë në të kaluarën, siç duket qartë dhe unë i kam paralajmëruar për koherencë, kanë qenë në funksion të Edi Ramës, që nga djegia e mandateve, që nga bojkoti i reformës administrative, djegia e mandateve që i dha kartonat Ramës për dy vjet për të miratuar ligjet”, shtoi Meta.
