Kryetari i Kuvendit, Ilir Meta pas takimit me Zv.ndihmëssekretarin amerikan të Shtetit, Hoyt Brian Yee, priti një delegacion të Asamblesë Parlamentare të OSBE që përbëhej prej; Roberto Battelli, Zv. President i AP OSBE, Andreas Nothelle, Përfaqësues i Veçantë i AP OSBE dhe Bernd Borchardt, Ambasador i OSBE në Tiranë.
Në takimin me anëtarët e delegacionit Meta shprehu mirënjohje për bashkëpunimin e deritanishëm me Asamblenë Parlamentare të OSBE. “OSBE rol të rëndësishëm për forcimin e demokracisë dhe përmirësimin e standardeve të zgjedhjeve në Shqipëri”, tha Meta.
Ndërkohë, gjatë fjalës së tij Battelli theksoi se OSBE është e gatshme të ndihmojë në lehtësimin e dialogut. “Progresi demokratik i Shqipërisë i shërben paqes dhe stabilitetit në rajon”, theksoi ai.
Sakaq, kreu i Kuvendit, tha se Shqipëria ka nevojë për një marrëveshje të përgjegjshme mes palëve.
“Zgjidhja të bazohet në gjithëpërfshirje dhe dialog konstruktiv politik. Askush nuk duhet të luajë me fatin e qytetarëve shqiptarë. Sot më shumë se kurrë nevojitet pjekuri, përgjegjshmëri kombëtare dhe vullnet për të gjetur kompromisin e munguar. Kompromisi në interes të zgjedhjeve të lira e të ndershme”, pohoi Meta.
