Argjentina ka kaluar makthin dhe në fundin e takimit ka siguruar një biletë për në fazën 1/8 e Botërorit. Në fundin e takimit një gol nga Rojo solli edhe triumfin e Argjentinës përballë Nigerisë e cila deri në atë moment ishte duke jetuar një ëndërr. Lionel Messi ka kaluar kombëtaren e tij në avantazh që në minutën e 14’. Ishte goli i 100 i këtij Botërori dhe padyshim që i ka sjellë shumë fat.
Ylli i Barcelona-s kishte një mundësi të artë nga një goditje standarde shumë afër për vetëm shtylla i mohon dyfishimin e rezultatit.
Pas pushimit situata komplikohet për të besuarit e Sampaoli-t, teksa Mascherano shkakton penalltinë që shndërrohet në gol nga Moses.
Argjentina hidhet në sulm për golin e fitores dhe ia arrin në fund me mbrojtësin Rojo i cili kishte dalë edhe ai përpara për golin. Me këtë fitore Argjentina kualifikohet për në fazën e 1/8-ave. Argjentinën tani e pret Franca në fazën tjetër.
Ndërkohë Kroacia ka fituar në fund ndaj Islandës me rezultatin 2-1. Ishin kroatët ata që shënuan të parët me anë të Badelj në fillim të pjesës së dytë. Por Sigurdsson barazon rezultatin duke i dhënë shpresë islandezëve nga pika e bardhë e penalltisë. Por në fund të takimit ishte Perisic ai që eliminoi përfundimisht Islandën. Duke i dhënë një ndihmë edhe Argjentinës.
