Medon Berisha ia doli të kthehej në fushë në fundjavën e kaluar me fanellën e Leçes, duke lënë pas dëmtimin që kishte pësuar. Por tani pengesë për lojtari është bërë një situatë gripale që me shumë mundësi do ta lërë jashtë ndeshjes së fundjavës kundër Monzës.
Berisha pritej të kishte më shumë minuta në këtë duel, pasi trajneri Marko Xhampaolo e sheh si një futbollist të rëndësishëm për skemat e tij, pasi mbulon mirë të dy fazat e lojës në mesfushë. Por një situatë gripale ka bërë që Berisha të humbasë stërvitjen për të tretën ditë radhazi, pasi është me temperaturë dhe nuk mund të stërvitej.
Kësisoj, në mediat italiane e shohin shumë pak të mundshëm kthimin e tij në ekip në ditën e shtunë dhe sidomos praninë në fushën e lojës ndaj Monzës të dielën. Një hap i vogël mbrapa për mesfushorin, i cili nuk e ka nisur në mënyrën më të mirë vitin 2025, por ku pritet të ketë një rol protagonisti me Leçen sapo të gjejë formën optimale.
