Edi Rama di si të bëhet lajm. Sidomos kur është fjala për shoqen e tij të ngushtë, Giorgia Meloni, me të cilën gjithmonë prodhon tituj – herë me ndonjë puthje, herë duke u ulur në gjunjë. Dyshja dukshëm është kthyer në një magnet mediatik sa herë takohen.
Ja si e komentojnë mediat e ndryshme italiane “provokimin” e radhës të Ramës dhe Melonit: Për Samitin e Komunitetit Politik Evropian që po mbahet në Tiranë, Rama i priti të gjithë liderët njësoj, ashtu siç zakonisht vepron një kryetar shteti apo qeverie kur pret një takim ndërkombëtar – me shtrëngim duarsh dhe foto zyrtare. Por për Giorgia Melonin, kryeministri shqiptar bëri një përjashtim, duke u ulur në gjunjë mbi tapetin e kuq, nën një shi të dendur. “Edi, duhet ta ndalosh këtë”, ia ktheu me të qeshur Meloni.
Nuk është hera e parë që Rama i përulet Melonit – ai e kishte bërë të njëjtin gjest edhe në janar, në ditëlindjen e 48-të të kryeministres italiane, kur i dhuroi një shall.
Raporti mes Ramës dhe Melonit përshkruhet si i çuditshëm. Ai, kryetar i Partisë Socialiste të Shqipërisë dhe potencialisht një aleat i ardhshëm i të majtës evropiane të Elly Schlein. Ajo, deri para pak kohësh, liderja e të djathtës konservatore në BE. Në teori, ndarje të mëdha ideologjike – në praktikë, një “marrëdhënie shumë e veçantë”.
Ndoshta është për shkak të fondeve të shumta që Italia i ka dhënë Shqipërisë për të pritur qendrat e migrantëve – Rama dje i mbylli derën homologut britanik Starmer duke thënë: “Bashkëpunim? Vetëm me Italinë.” Apo ndoshta është interesi i Ramës, përtej së majtës apo së djathtës, për të ruajtur marrëdhënie të mira me Italinë – vendi që sponsorizon integrimin e Shqipërisë në BE.
