Ndërsa administrata amerikane po mendon për të vendosur sanksione shtesë dhe masa të tjera kundër Rusisë, ekipi i Presidentit Donald Trump nuk është ende i sigurt se sa larg është i gatshëm të shkojë presidenti amerikan.
Në një përpjekje për të bindur presidentin Trump për të ndryshuar qëndrimin e tij ndaj Rusisë, disa nga zyrtarët e tij të lartë të administratës, po e nxisin për sjellje më agresive pas përfshirjes së supozuar të Moskës në helmimin e ish oficerit të inteligjencës ruse Sergei Skripal dhe vajzës së tij në Mbretërinë e Bashkuar, shkruan sot “New York Times”.
Zyrtarët e Shtëpisë së Bardhë, të cituar nga gazeta, thanë se ndërsa presidenti është gjithnjë edhe më i bindur se Rusia është e rrezikshme, ai ende nuk ka pranuar të zbatojë një qëndrim më të ashpër publik dhe mbetet i pasigurt se sa larg do ta autorizojë administratën e tij për të vepruar me Rusinë.
Shtetet e Bashkuara kanë dëbuar 60 diplomatë rusë dhe kanë mbyllur konsullatën e përgjithshme ruse në Seattle.
Përveç Shteteve të Bashkuara dhe Britanisë së Madhe, 16 vende të BE-së, si dhe Kanadaja, Shqipëria, Norvegjia, Ukraina, Maqedonia dhe Australia thanë se po dëbonin mbi 150 diplomatë rusë në lidhje me përfshirjen e supozuar të Moskës në sulmin e agjentit nervor ndaj Skripalit dhe vajzës së tij.
Në kundërpërgjigje, Rusia po përjashton një numër të barabartë diplomatësh perëndimorë.
Rusia e ka mohuar fuqishëm çdo lidhje me çështjen e helmimit të Skripal dhe ka ofruar ndihmë në hetimin në vazhdim.
