Analisti Artur Meçe deklaroi se zgjedhjet e 11 majit janë një moment vendimtar për shqiptarët, të cilët duhet të zgjedhin mes integrimit në Bashkimin Evropian dhe rikthimit të Sali Berishës.
Në një intervistë televizive, Meçe u shpreh se Berisha duhej të ishte dënuar për korrupsion, por fakti që për 12 vite nuk u ndëshkua i jep atij hapësirë për të pretenduar se nuk është i korruptuar dhe se do të luftojë korrupsionin.
Sipas Meçes, problemi kryesor qëndron te sistemi i drejtësisë, i cili nuk e ka goditur korrupsionin në nivelet e ulëta dhe të mesme. Ai vlerësoi punën e kreut të SPAK, Altin Dumani, por tha se reforma në drejtësi ka dështuar në ndëshkimin e zyrtarëve të lartë të përfshirë në korrupsion.
Analisti theksoi se nëse Berisha nuk është ndëshkuar ligjërisht, ai dhe mbështetësit e tij e shfrytëzojnë këtë për të sfiduar akuzat dhe për të marrë pozita morale në debatin politik.
“Për 12 vjet, Berisha i cili ishte certifikuar si person i korruptuar, sistemi i drejtësisë nuk e ndëshkoi, për 12 vjet nuk gjetën asnjë fakt. Shqipëria ka probleme serioze me korrupsionin, por më i korruptuari në Shqipëri, merr të drejtën dhe thotë, unë nuk jam i korruptuar, ju jeni. Tani kanë marrë moralin dhe godasin, duke harruar se kush janë. Nuk ia hedh fajin Berishës me thënë të drejtën. Një kriminel sa politik dhe ekonomik, vrasës serial, por 12 vjet, nuk e dënove. Krimineli të bën moral. Duke përjashtuar Altin Dumanin, nuk është vetëm SPAK. Ne kemi problem të madh në drejtësinë e niveleve të ulta dhe mesatare. Thashë, për 12 vjet nuk e godite korrupsionin në drejtësi. Nuk i ndëshkove, ish prokurori i përgjithshëm në kohën e Berishës, del në takimet e tij dhe krah tij. Të njëjtën gjë kemi me Gjin Gjonin. Kur me reformën në drejtësi nuk i ndëshkove, sot në kushtet e prezumimit të pafajësisë, është e drejta e tyre, kanë të drejtën e tyre. Ky është problemi që vuajmë dhe do të vazhdojmë të vuajmë. Nuk i themi dot je i korruptuar, kur nuk u dënove për 12 vjet”, theksoi ai.
