U bë viti i dytë që dy partitë kryesore të mazhorancës e kanë kthyer 1 Prillin, ditën e gënjshtrave, në një të “vërtetë të madhe”. Edhe sot në këtë datë, në respekt të koalicionit, Partia Socialsite ka tërhequr kandidaturën e Kavajës për kryetar bashkie. Pas disa kërkesave dhe deklaratve të LSI-së, në lidhje me zgjedhjet në këtë qytet, PS ka vendosur të lëshoj pe.
Vetë Silvana Daja ka njoftuar se heq dorë nga kandidimi, në mënyrë që të mos bëhet shkaktare për sherrin në “politikën e madhe”.
Deklarata e Silvana Dajës:
Miq, gjatë ditëve të fundit kam parë tymnajën e madhe të krijuar mbi kandidimin tim në pozicionin e Kryetares së Bashkisë së Kavajës, qyteti ku kam lindur, ku kam ndërtuar familjen dhe ku do kaloj jetën. Pavarësisht se në jetën time nuk i kam bërë keq asnjë mize dhe do doja të jepja më të mirën nga vetja në këtë proces, zhurma e ngritur kaloi çdo imagjinatë dhe parashikim, duke sulmuar bashkëshortin tim, i cili për mua vlen më shumë se një karrige. Ndaj, nisur nga molla e sherrit, që Kavaja e vogël, por e bukur, ka shkaktuar në politikën e madhe, me keqardhje dua të heq dorë nga ky kandidim dhe të tregoj tolerancën që më ka karakterizuar gjithë jetën, me qëllim që, asnjëherë mos jem bllokuese e fateve të askujt.
Një falenderim për gjithë qytetarët të cilët pavarësisht kohës së shkurtër, më kanë mbështetur dhe kanë qënë të gatshëm të bëjnë këtë udhëtim me mua. Gjithashtu, falenderoj çdo socialist dhe socialiste që ka qënë përkrahës i emrit tim. Zotohem se si qytetare do kontribuoj për kryetarin e rradhës, sepse dua me shpirt që Kavajën ta shoh vetëm në ditë të mira. Me respekt SILVA DAJA.