Hapet ura më e gjatë në botë që kalon nëpërmjet detit, pas 9 vitesh punime. Ura me vlerë 20 miliardë dollarëshe lidh Hong Kongun dhe Macaun me qytetin kinez Zhuhai.
Hapja u bë këtë të martë, në një ceremoni ku mori pjesë edhe presidenti Xi Jinping. Kjo urë e mahnitshme është e gjatë 55 kilometra dhe përfshin 11 qytete, përfshirë Hong Kongun dhe Macaun, ku jetojnë 68 milionë njerëz.
Në fakt, ajo duhej të ishte hapur në vitin 2016, por pati vonesa për shkak të problemeve gjatë punimeve.
Gjashtë vite janë dashur për projektimin, 8 vite punë, një tunel 6.7 km i gjatë që lejon kalimin e anijeve dhe një ishull artificial 625 metra katrorë, që në vetvete është mbresëlënës.
Sipas projektuesve, kjo urë do të shkurtojë udhëtimin mes qyteteve nga 3 orë në 30 minuta. Megjithatë, automjetet private duhet të pajisen me një leje speciale për ta përdorur këtë urë.
Projekti i urës është kritikuar jo pak në Hong Kong, ku ka pasur pak kërkesë publike për lidhje më të ngushta me Macaun apo Zhuhain, ndërkohë që ekzistonte edhe frika se qyteti do të tejmbushej me turistë nga Kina.
Ura është e projektuar që t’u bëjë ballë tërmeteve dhe tajfuneve.
