Gjatë mbledhjes së zhvilluar pasditen e sotme me strukturat politike të Partisë Socialiste në Tiranë, kryeministri Edi Rama ka kërkuar angazhim maksimal nga të gjithë eksponentët e partisë për zgjedhjet e pjesshme vendore që do të mbahen më 9 Nëntor, me fokus të veçantë tek Bashkia e Tiranës.
Në këtë takim, Rama ka bërë ndarjen e zonave të përgjegjësisë për deputetët e PS-së në territorin e Bashkisë Tiranë, duke u kërkuar atyre një prezencë aktive në terren.
Mësohet se ndarja e zonave për deputetët dhe ish-deputetët është e njëjta me ato që janë bërë për zgjedhjet parlamentare të 11 majit.
Burime nga mbledhja bëjnë me dije se në fushatë do të përfshihen edhe ministra të kabinetit qeveritar, të cilët do të angazhohen drejtpërdrejt për të mbështetur organizimin elektoral në kryeqytet dhe për të garantuar një mobilizim të gjerë të elektoratit.
Rama ka kërkuar që në 9 nëntor PS të sigurojë një fitore sa më të madhe. Sa i përket datës së zgjedhjeve, Rama është shprehur në takim se ajo ishte zgjedhja e Presidentit Bajram Begaj.
