Ambasadorja e Greqisë në vendin tonë, Konstantina Kamitsi ka reaguar për herë të parë lidhur me vendimin e marrë ditën e djeshme nga GJKKO, për të mos lejuar Fredi Belerin të dalë nga qelia për tu betuar si kryetari i Bashkisë së Himarës.
Në një prononcim për mediat, nga Himara, aty ku dhe udhëtoi mëngjesin e sotëm për të marrë pjesë në konsituimin e Këshillit Bashkiak, tha se mungesa e Belerit në mbledhjen e parë përbën goditje të madhe në shtetin e së drejtës.
“Mungesa e kryetarit të zgjedhur në mënyrë demokratike, Fredi Beleri në mbledhjen e parë të këshillit bashkiak përbën goditje të madhe në shtetin e së drejtës dhe parimin themelor të prezumimit të pafajësisë”, tha ajo.
Ambasadorja greke u shfaq mëngjesin e sotëm pranë ambienteve të Bashkisë së Himarës së bashku me kryetarin e PBDNJ, Vangel Dule, të cilët së bashku me familjarët e Belerit ndoqën nga afër betimin e Këshillit Bashkiak.
Ndërkohë, Fredi Beleri nga qelia e burgut iu drejtua me një letër Këshillit Bashkiak, i dalë nga zgjedhjet e 14 Majit.
Në letrën e tij, Beleri thekson se si një qytetar i cili ka mësuar që të mbrojë idetë e tij për liri dhe demokraci do të vijojë të durojë deri në momentin që drejtësia të triumfojë, pasi pavarësisht sulmeve të bëra ai beson te e vërteta. Kujtojmë se një ditë më parë Gjykata Speciale rrëzoi kërkesën e Fredi Belerit, i cili kërkoi të shkojë këtë të martë përpara Këshillit Bashkiak e të betohet si kryetar i Himarës.
Fredi Beleri, kandidat i koalicionit opozitar “Bashkë Fitojmë”, u arrestua dy ditë para zgjedhjeve të 14 Majit dhe akuzohet për blerje votash.
