Në Durrës, situata e virozave ka arritur kulmin, me rreth 500 vizita ditore në spitalin rajonal. Mjekët i bëjnë thirrje qytetarëve të trajtojnë simptomat në kushte shtëpie dhe të shmangin përdorimin e antibiotikëve pa rekomandimin e mjekut.
Sipas nëndrejtorit të spitalit, Elton Cekaj, rastet e vizitave janë mbi normën e zakonshme, me rreth 300 pacientë në urgjencën e përgjithshme dhe 200 në atë pediatrike. Megjithatë, vetëm një numër i vogël i të sëmurëve ka nevojë për shtrim në spital, kryesisht të moshuarit dhe personat me sëmundje kronike.
Mjekët theksojnë se fëmijët janë më të prekurit nga virozat dhe rekomandojnë trajtime të thjeshta si përdorimi i barnave kundër temperaturës, konsumimi i lëngjeve dhe shmangia e veshjeve të trasha. Ndërkohë, qytetarët këshillohen të drejtohen fillimisht te mjeku i familjes për të shmangur mbingarkesën në urgjencë dhe përhapjen e mëtejshme të infeksioneve.
Sipas specialistëve, pritet që situata të përmirësohet drejt fundit të shkurtit, me uljen e virozave si pasojë e ndryshimit të temperaturave.
