Franca ka kaluar në fazën çerekfinale të Botërorit të Rusisë pasi ka mposhtur Argjentinën me rezultatin 4-3. Të gjithë prisnin që “gjelat” të tregonin fytyrën e vërtetë në këtë Kupë Bote, pasi kanë në përbërje shumë yje dhe ky duket se ishte momenti i duhur që ata të shfaqeshin. Ishte Kylian Mbappe njeriu i ndeshjes me dy gola dhe një penallti të fituar me mjaft zgjuarsi. Nga ana tjetër Argjentina me Lionel Messin në krye paketojnë valixhet dhe duhet të nisen drejt vendlindjes së tyre.
Që në startin e pjesës së parë janë francezët që dominojnë dhe shfaqen rrezikshëm me Griezmann i cili prek traversën pas një goditje dënimi.
Ndërsa në minutën e 13’ një shpërthim i Mbappe, i cili merr topin nga zone dhe kalon këdo që i del para deri në zonën kundërshtare duke fituar edhe një penallti të cilën e shkakton Rojo. Griezmann merr përsipër ekzekutimin e penalltisë dhe e dërgon në rrjetë.
Argjentina përpiqet të fitojë terren dhe është Di Maria që shënon një gol mjaft të bukur nga një distancë e konsiderueshme. Një goditje pa shumë pretendime në plan të parë, por topi merr një trajektore dhe përfundon në cepin e portës ku portieri Lloris nuk mund të bënte asgjë.
Pjesa e dytë nis vrullshëm për argjentinasit, është Mercado që devijon topin pas një goditje të Messit drejt portës dhe Lloris sërish hidhet në krahun e kundërt.
Në minutën e 57’ “zgjohen” francezët me Pavard. Një goditje spektakolare nga jashtë zone pas harkimit të Hernandez dhe topi fluturon drejt portës.
Këtu fillon dhe makthi për argjentinasit, nga njeriu që mban emrin Mbappe. Hernandez është sërish protagonist me një harkim nga e majta dhe Mbappe lëviz mjaft mirë në zonë duke e dërguar topin në rrjetë.
Nuk zgjat shumë vetëm 4’ minuta dhe francezët gjejnë dhe golin e katërt dhe të sigurisë. Është sërish Mbappe që dërgon topin në rrjetë pas një pasimi mjaft të mirë të Giroud i cili e nxjerr të vetëm përballë portës.
Argjentina përpiqet të hapë sërish ndeshjen duke hedhur në fushë Agueron dhe Mezan, por duket se është shumë vonë. Në minutën e 93’ është një asist perfekt i Messit për Aguren dhe ky i fundit e dërgon në rrjetë.
