Ditën e sotme mbahet Konventa e Partisë së Lirisë në Pallatin e Kongreseve në Tiranë. Mësohet se në Konventë do të jenë të pranishëm 931 delegatë dhe mbi 2000 të ftuar.
Kreu i PL-së Ilir Meta do të kandidojë përballë ish-drejtorit të Policisë së Kamzës, Faik Basha për postin e Presidentit. Ndërsa Erisa Xhixho ka përballë anëtaren e Komitetit Drejtues Kombëtar, Myrvete Asqeri në postin e zv.Presidentit të Partisë.
Sot kreu i PL-së, Ilir Meta postoi një mesazh në “Facebook”, ku ka treguar se ka marrë përshëndetjen e parë nga Vlora për organizimin e Konventës. Pas Vlorës, një tjetër postim tregon dhe përshëndetjen e ‘delegatëve’ Pukës dhe Fushë-Arrëzit. Lidhur me këtë ngjarje, sekretari i Përgjithshëm i Partisë së Lirisë, Tedi Blushi ka publikuar rendin e ditës.
Në një postim të bërë në Facebook, Blushi shkruan se në Konventë do të marren vendime historike për vënien në jetë të 5 prioriteteve kryesore për 4 milion shqiptarë plus. Mësohet se kreu i PL, Ilir Meta ka mbërritur më herët. Ai është takuar me përfaqësues të PL-së dhe simpatizantë të kësaj partie.
Deputetja e Partisë së Lirisë, Monika Kryemadhi, e cila u la jashtë Kryesisë së PL-së, tha për mediat, para nisjes së Koventës së PL, se nuk do të krijojë një fraksion të ri brenda kësaj force politike. Ajo tha se ‘fraksionin nuk e bën për show.
Kryemadhi u shpreh se është gladiatore me taka, nuk ka turp as nga takat dhe as të vishet si grua, sepse, siç tha ajo, është grua. Ajo shtoi se beteja e saj ka të bëjë me rritjen e shumë figurave të reja.
