Në Suedi është mbajtur Festivali i Folklorit Shqiptar, organizuar nga Unioni i Shoqatave Shqiptare.
Ky manifestim tradicional u mbajt në qytetin e Vekshjos, ku u paraqiten grupe amatore, ansamble folklorike dhe rapsodë, të cilët prezantuan vlerat e folklorit shqiptar përmes këngëve folklorike, valleve instrumentale si dhe me vallëzimin e valleve që kultivohen në trojet shqiptare.
Në përfundim të këtij festivali, pati edhe një vlerësim nga juria e përbërë nga Ahmet Bella, Marsela Basha dhe Ismail Binakaj.
Sipas këtyre vlerësimeve, vendin e parë e morën Grupi i valleve i shoqatës nga Borosi, që u nderua për vallëzimin e “Vallës së Drenicës”, kurse valltarët nga Vekshjo për vallëzimin një “mozaik” vallesh me motive nga Kosova. Vendi i dytë iu dha valltarëve të shoqatës “Iliria” nga Norshopingu, të cilët kishin konkurruar me “Vallen e Tiranës”.
Shpërblimi special i Festivalit iu dha rapsodit Dervish Kuqi për interpretimin e shkëlqyeshëm të këngës “Po këndoj në festival”, shkruan KultPlus.
“Festivali në përgjithësi ishte i suksesshëm. Garuesit ishin bukur të përgatitur nga koreografët si dhe koloriti i veshjeve ishte i begatshëm dhe përfaqësoi shumë pjesë të atdheut tonë”, theksoi kryetari i jurisë, Ahmet Bella.
