Boksieri amerikan Floyd Mayweather ka fituar me “KO” në raundin e parë ndaj japonezit Tenshin Nasukawa, sportist i kickboxing. Një duel “show” me 3 raunde me nga 3 minuta secili zhvilluar sot në Tokio, por që në fakt zgjati shumë pak. Sfida ishte e vlefshme për eventin “Rizin 14”, që u zhvillua në “Saitama Super Arena”të Tokios, një duel që nuk do të llogaritej në skedën e dy sportistëve.
https://twitter.com/CM_fights/status/1079747164472070145
Që në raundin e parë, Mayweather, 50 fitore e asnjë humbje në karrierën e tij si boksier, tregoi se për të nuk ka duele “show”, duke hedhur dy herë në tapet rivalin anonim. Kjo detyroi gjyqtarin e sfidës që ta ndalte shumë herët atë, me Nasukawa që shpërtheu në lot për këtë disfatë para fansave të tij. Nga ana tjetër, Mayweather qeshte e kërcente në ring, duke mos pësuar asnjë gërvishtje nga pak minuta që qëndroi në ring.
https://twitter.com/SheldanKeay/status/1079745872823574528
Mayweather rikthehej në ring pas 18 muajsh, që pas fitores ndaj Conor McGregor, në gusht të 2017-ës. Kjo sfidë e boksierit amerikan ishte më së shumti për para, një “show”, ndaj një rivali enigmë dhe pak të njohur. “Ne jemi sërish të dy të pamposhtur dhe u ngjitëm në ring për të argëtuar fansat. Tenshin është ende një sportist i madh, ndërsa unë një sportist tashmë i tërhequr”, tha Mayweather.
