Dita e diel do të jetë hera e fundit që Felipe Massa do të zbresë në pistë për të garuar, pasi ka vendosur të mbyllë karrierën e tij në Formula 1. Në prag të tërheqjes ai ka ndaluar të flasë për disa nga ish-shokët e skuderive për të cilat ai ka garuar. Massa ka veçuar Fernando Alonson si shokun më të mirë të skuadrës që ka pasur dhe se ai është piloti më i mirë që ka parë, madje ka vend për krahasim edhe me Michael Schumacher.“Ka qenë në të njëjtin nivel me Michael Schumacher. Është po aq i fortë sa edhe Hamilton, por nuk besoj se do të jetë në gjendje të duelojë për titullin vitin tjetër. McLaren do të jetë më e shpejtë me motorin Renault, por jo aq e shpejtë sa Mercedes dhe Ferrari. Fatkeqësia e Alonso është se ka pilotuar Ferrarin dhe McLaren në momentin më të keq të këtyre makinave, duke mos fituar dot titullin”, tha Massa, që do të mbyllë karrierën e tij në Formula 1 ditën e diel, në pistën e Abu Dhabi.
Ndërsa sa i përket kampionit gjerman Vettel, ai e ka vlerësuar për cilësitë që ka, por gabon shumë dhe këto gabime e kanë kushtëzuar që ai ë fitojë më shumë.“Sebastian është një kampion, një pilot i madh, por që bën shumë gabime, që e kanë penalizuar jo pak dhe që mund të kishte fituar më shumë. E njëjta gjë vlen edhe për Max Verstappen, por që mund të përmirësohet ende, pasi është shumë i ri”, tha Massa, që duke folur për makinën Ëilliams, dikur kampione, shtoi: “Për të fituar duhet një buxhet më i madh. Kanë një pilot të ri, si Lance Stroll, por duhen edhe 2-3 sezone për të kuptuar potencialin e tij real si pilot”.
