Të gjithë menduan se ai do ti jepte fund futbollit të luajtur te Juventusi, por nuk ndodhi kështu. Claudio Marchisio pas më shumë se 20 vitesh që mbronte ngjyrat bardhezi është larguar nga Torino, që i kushtoi gjithë karrierën për tu bashkuar me Zenitin në Rusi. Ishte më qartë një shkëputje kontrate me pëlqimin e të dyja palëve dhe më pas italiani u akomodua tek ekipi rus.
Mesfushori tashmë është gati të vazhdojë aventurën e tij të re në Rusi, ku ka zbarkuar bashkë me familjen e tij. “Më ka bindur menjëherë projekti dhe gjithçka te klubi i Zenitit, ndaj nuk u mendova gjatë për ta pranuar këtë mundësi. Kam ardhur në Rusi bashkë me familjen time, për të nisur një etapë të re jo vetëm në karrierën time sportive, por edhe në jetën familjare”, deklaroi Marchisio.
Italiani nuk harron të falënderojë Juventusi për vitet e mrekullueshme që ka kaluar aty dhe për trofetë e shumta që ka ngritur në qiell. Por ka treguar edhe një prapaskenë aspak të mirë që ka lënë një shije të keqe tek futbollisti.
“Keqardhja ime e vetme është se thoshin që jam i dëmtuar dhe më linin jashtë, ndonëse kjo nuk ishte aspak e vërtetë. Ata mundoheshin të mashtronin tifozërinë e mrekullueshme, se unë isha i dëmtuar, ndonëse unë gëzoja formë mjaft të mirë. Megjithatë asnjëherë nuk bëra polemika dhe qëndrova në heshtje, pasi nuk doja të prishja një ambient të mrekullueshëm si ai bardhezi”, tregoi Marchisio.
