Zëvendëskryeministri dhe ministri i Punëve të Jashtme, Nikolla Poposki, sot, nga Brukseli i është përgjigjur presioneve të ndërkombëtarëve në lidhje me mundësinë e mbajtjes së zgjedhjeve të reja parlamentare. Poposki ka thënë se për zgjedhje të reja parlamentare vendosin institucionet demokratike në vend dhe jo dikush nga jashtë.
“Mendoj se vendimin për atë se nëse do të ketë zgjedhje dhe kur ato do të ndodhin nuk duhet ta sjellë dikush jashtë Republikës së Maqedonisë. Ai është vendim që duhet ta sjellim në Republikën e Maqedonisë dhe mënyra e vetme sipas të cilës do të mund të dakordohemi rreth asaj është përmes institucioneve demokratike. Me fjalë të tjera, Kuvendi i Maqedonisë vendos, qytetarët e Maqedonisë kanë të drejtë të japin mandat për një vendim të tillë”, ka deklaruar ministri Poposki.
Shefi i diplomacisë së Maqedonisë, tha se presin nga Parlamenti Evropian që të mbështet vendin në rrugën e tij drejt integrimeve evropiane. “Pika e parë është të ndihmohet në kthimin e perspektivës evropiane të Republikës së Maqedonisë, e cila vitet e fundi, përkrah rekomandimeve të shumta, sikur është zhdukur nga horizonti dhe në një farë mënyre ka ndihmuar të imponohet agjenda e luftës me një situatë të krizës politike. Vendimi edhe për zgjedhjet edhe për tejkalimin e krizës, duhet të jetë përmes institucioneve të Maqedonisë dhe në kuadër të një procesi demokratik”, ka shtuar ai.
Nga ana tjetër, porosia e Parlamentit Evropian ka qenë se pritet të jepet mbështetje për një ardhmëri më të qartë në pjesën e fillimit të procesit të negociatave me vendin.
Ndërkaq, qëllimi i vizitës së sotme në Bruksel, ka qenë një konferencë ndërkombëtare e organizuar nga ana e Partisë Evropiane Popullore dhe Aleanca e liberal-demokratëve të PE-së. Në kuadër të kësaj vizite, Poposki realizoi takime me eurodeputetët Dubravka Shuica, Knut Flekenshtajn, Marijana Petir dhe Eduard Kukan, raporton “Shenja”
