Ish-ministri i Drejtësisë, Ylli Manjani nëpërmjet një statusi në rrjetin social facebook, ka thumbuar sërish Partinë Socialiste dhe Policinë e Shtetit.
Sipas tij, premtimi se “do bëjmë zgjedhje shembullore” duket sikur bën “ishshsh” pa patur pula. Gjithashtu, Manjani shkruan se Policia që dua” paska qenë e llullatur në hashash.
Statusi:
Pa standart…
Deri para tre vitesh hashashi kapej me kilogramë, por shitej me tonë. Sot kapet me tonë, por tregtohet me tonelata…
Policia sot deklaron se po vendos rend brenda vetes! Premtimi është që policia nuk do kultivojë më hashash!!! “Policia që dua” paska qenë e llullatur në hashash! Kulmi!
Në fakt nga policia pritet të ndalohen kultivuesit dhe trafikantët. Mesa duket, edhe këtë herë ata do jenë të lirë, sepse policia po merret me trafikantët brenda vetes…
Sidoqoftë, ende nuk është pastruar policia ku janë plantacionet më të mëdha. Vlora, Gjirokastra, Saranda, por edhe Berati e Durresi janë zona ku luhet hashashi sheshit. Boshatisja e policisë së Lezhës nuk mund të jetë as krenari e as alibi për të fshehur kërdinë e drogës në qendrat e tjera!
Sa i takon policisë në zgjedhje, ajo s’ka rol dhe s’mund të premtojë (siç po premton) se do sillet mirë! Që pas vitit 2001, roli ligjor i policisë në zgjedhje është i reduktuar. Premtimi se “do bëjmë zgjedhje shembullore” duket sikur bën “ishshsh” pa patur pula.
Nuk dua të besoj se “gjuha ju shkon aty ku dhemb dhëmbi”, por që ta besoj duhet te shoh të shkarkuar ato policë që haptazi bëjnë fushatë për partinë e Kryeministrit!
E çuditshme! Po rikthehemi gjithnjë e më shumë te histori të tejkaluara në vite…! Ndoshta ky ishte misionini Rilindjes, të rikthejë të shkuarën!
Po të paktën të kishin rilindur a rikthyer ndonjë gjë të mirë e jo Levat e Partisë së Punës që ishin subjekte zgjedhore si opozitë e emëruar.
