Zv.kryeministrja teknike , Ledina Mandija, njëherësh drejtuesja e Task Forcës për monitorimin e zgjedhjeve, i është përgjigjur akuzave të ish-kreut të LSI-së, Ilir Meta lidhur me pretendimet se janë shkarkuar padrejtësisht punonjës nga administrata.
Zv.kryeministrja pohoi se deri më tani është bërë asnjë shkarkim i padrejtë përsa u përket punonjësve te administratës që kanë marrë pjesë në fushatë.
Në një intervistë për “Tvklan”, ajo sqaron se të gjitha rastet kanë prova të pakundërshtueshme, të cilat nëse kanë patur brenda dhe konsumimin e veprës penale janë referuar në prokurori.
Mandija jep këtë përgjigje për Ilir Metën, i cili e quajti disa ditë më parë Task Forcën si një “Gestapo që po heq nga puna njerëzit”.
Ajo sqaron se Task Forca ka bërë edhe verifikime për akuzat e Lëvizjes Socialiste për Integrim lidhur me implikimin e kreut të Policisë së Shtetit me persona të cilët merren me tregtinë e kanabis-it, por për këtë nuk është gjetur asnjë provë.
Në një muaj punë, Task Forca nuk ka gjetur asnjë rast ku paratë e kanabisit të jenë përdorur për blerjen e votës.
