Shkarkimi i Jose Mourinhos nga posti i trajnerit të Manchester United nuk ishte surprizë. Ky sezon nuk po shkonte aspak mirë për “Djajtë e Kuq” dhe shume lojtarë kishin dalë kundër trajnerit portugez, por humbja përballë Liverpool rezultoi fatale për fatin e ‘Special One’.
Ole Gunnar Solskjaer do të jetë trajneri i ri i Manchester United, një legjendë e skuadrës i cili pritet të sjellë pozitivitetin në grupin e lojtarëve dhe në marrëdhënien e tyre me tifozët. 45-vjeçari kaloi 11 sezone në Old Trafford, duke shënuar shkëlqyeshëm golin fitues në finalen e Ligës së Kampioneve të vitit 1999 kundër Bayern Munich por jo vetëm ai ka luajtur 366 ndeshje me United, duke shënuar 126 gola në 12 vite karrierë.
Vetë trajneri i ri shprehet shumë i kënaqur: “Manchester United është në zemrën time dhe është e mrekullueshme që të rikthehem si trajner. Unë jam i gatshëm të punoj me skuadrën, ata janë shumë të talentuar.”
Zëvendëspresidenti ekzekutiv Ed Woodward komentoi: “Ole është një legjendë e klubit dhe ka eksperiencë të madhe, në fushë dhe si trajner. Historia e tij te Manchester United do të thotë që jeton me këtë kulturë, të gjithë në klub janë të lumtur që ai dhe Phelan rikthehen. Jemi të bindur se ata do të rikthejnë unitetin mes lojtarëve dhe tifozëve”.
