Nga LOUIS VAN GAAL/ Klop e ka kthyer Liverpulin në një makinë luftarake, si në sulm ashtu edhe në mbrojtje. Kështu që nëse ka një klub që unë do të vendosja paratë e mia për të fituar titullin, ai do të ishte Liverpuli. Skuadra e Liverpulit nuk është skuadra e cilësisë më të lartë kur vjen puna te kualiteti i futbollistëve.
Në fakt, lojtarët më cilësorë janë te Mançester Siti. Por, në të njëjtën kohë, kjo është edhe dobësia e Guardiolës. Ai i stërvit skuadrat e tij vetëm në sulm, gjithnjë. Momenti që skuadra e tij duhet të mbrojë, ata duken të tmerrshëm. Liverpuli ka një skuadër që mund të mbrojë shumë më mirë.
Kjo për shkak se Klopi i ka stërvitur ata që të jenë një forcë luftarake, e kanë apo jo topin. Kjo është ekzaktësisht ajo që i mungon skuadrës së Guardiolës në këto momente. Siti ka ide të shkëlqyera futbolli dhe një stil të shkëlqyer loje, por jo shpirtin e duhur luftarak.
Mos më keqkuptoni, unë e dashuroj ende ta shoh sesi luan Siti. Por, mënyra sesi Klop e bën Liverpulin të luajë është absolutisht fantastike. Përballja direkte më bindi se Siti nuk mund të mbrojë. Kur Liverpuli barazoi, kishte mjaftueshëm mbrojtës të Sitit në zonë për ta parandaluar golin. Por, pjesën më të madhe të kohës në Premier Ligë, Siti nuk ka pse të mbrojë, sepse ata e dominojnë shumicën e kundërshtarëve. Kur ata përballen me një skuadër të fortë si Liverpuli, mund të shihnit se lojtarët e tyre nuk janë në gjendje të mbrojnë siç duhet. Ata duken të çorganizuar.
Liverpuli meriton duartrokitje, sepse shumica e ekipeve nuk e detyrojnë Sitin në situata mbrojtëse. Liverpuli e bëri këtë në një pikë në pjesën e dytë dhe pamë që Siti ishte në telashe. Shikoni Firminon, ai mezi e preku topin, por km e tij për skuadrën ishin të pabesueshme. Klop ka Manenë gjithashtu dhe Salahun që vrapojnë pafund. Ata të tre ndihmojnë të tjerët për të mbrojtur dhe kanë edhe energjinë për të kundërsulmuar dhe rifituar topin. Jam i kënaqur që Siti e mundi Liverpulin, sepse e bëri garën për titull më të bukur. Emocionet janë të mëdha në këto momente.
Tri skuadra mund të shpallen kampione, sepse nuk mund të përjashtojmë as Totenhemin. Por nëse ju më pyesni se cila nga pretendentet ka skuadrën më të mirë, unë do thosha skuadra e Klopit. Lojtarët e Liverpulit kanë një dëshirë më të madhe për ta fituar titullin dhe kjo do t’i ndihmojë që ta fitojnë kampionatin. Për mua, ata e duan atë më shumë se lojtarët e Sitit.
