As në ëndërr nuk e kishin parë se mund të mposhtnin një skuadër si Manchester United, duke e eliminuar nga Kupa e Anglisë, por tanimë është realitet dhe Grimsby ka avancuar në raundin tjetër të këtij kompeticioni. Ekipi që militon në ligën e katërt të futbollit në ishull u shortua përballë gjigantëve të Premier League, e kur gjasat ishin zero për një rezultat pozitiv, ndodhi e kundërta, duke shkaktuar reagime të shumta.
Të mërkurën u luajt dueli Grimsby-Man United, ku koha e rregullt u mbyll në shifrat 2-2. Vendësit shënuan dy herë në pjesën e parë duke i surprizuar të gjithë me golat e Vernam e Ëarren. Në fraksionin e dytë Mbeumo dhe Maguire rikthyen barazpeshën, e koha e rregullt u mbyll 2-2. Në bazë të rregullores nuk ka shtesë, por direkt penallti dhe u gjuajtën plot 26 të tilla.
Cunha dhe Mbeumo shpërdoruan penalltitë e tyre, ndërsa te Grimsby Oduor, duke bërë që rezultati i tyre të ishte 12-11. Një fitore historike kjo e skuadrës modeste, e cila i shkakton një humbje të tillë Manchester United, që duket se sërish do të ketë një edicion të vështirë. “Mendoj se skuadra më e mirë fitoi, e vetmja skuadër që ishte në fushë. Futbollistët më të mirë mund të humbasin, sepse një ekip i bashkuar mund të fitojë kundër çdo grupi lojtarësh. Sot, ata treguan më shumë, ndaj e pranoj: humbëm me meritë. Dua vetëm t’u kërkoj falje tifozëve. Ata na mbështetën jashtë mase, dhe për këtë nuk kam fjalë. Më vjen shumë keq”, deklaroi në përfundim trajneri Ruben Amorim.
