Malaj: Ekonomia shqiptare është zgjeruar me 3.6% në 6-mujorin e parë të 2025-ës
Malaj tha sot, 14 nëntor, se Shqipëria ka dëshmuar që ka një kapacitet për t’u përshtatur dhe për të mbrojtur trajektoren e saj të zhvillimit ekonomik. Ai theksoi se në 6-mujorin e parë të vitit 2025 ekonomia shqiptare është zgjeruar me 3.6%.
“Një performancë që dëshmon shëndetin e saj të mirë”, tha Malaj duke shtuar se rritja për vitin 2025 parashikohet të jetë 3.9%. Ai tha se rritja ka qenë gjithëpërfshirëse duke prekur të gjithë sektorët e ekonomisë.
Ai u shpreh se Shqipëria ka treguar maturitet në menaxhimin e rreziqeve dhe hartimin e politikave që kanë ndihmuar në minimizimin e kostove të ardhura nga goditjet e jashtme.
“Kjo përvojë na ka shërbyer për të forcuar besimin përballë sfidave të ardhshme”, tha Malaj.
Ministri bëri me dije se konsumi privat është rritur me 3.3% ndërkohë që investimet totale janë rritur me 4.1%. Sa i përket projekteve strategjike, sipas Malajt, do vazhdojnë të kenë një ndikim pozitiv në rritjen ekonomike të vendit tonë.
Ministri theksoi se tregu i punës po përjeton një transformim historik. Aiu u shpreh se Papunësia ka rënë në minimumin e saj historik, punësimi po rritet në mënyrë të vazhdueshme dhe pagat po përmirësohen në gjithë sektorët, qoftë publik apo privat.
“Rritja ekonomike po përkthhet në më shumë mirëqenie për qytetarëtr e e vendit tonë”, tha Malaj.
Inflacioni mbetet i ulët dhe i qëndrueshëm, u shpreh ministri duke theksuar se turizmi vazhdon të mbetet një nga sektorët më të rëndësishëm në vend.
Borxhi publik gjatë 2024 ka rënë 54.2%, që sipas Malajt është niveli më i ulët që nga viti 2008. Ai theksoi se edhe gjatë vitit 2025 pritet një balancë primare pozitive dhe reduktim i mëtejshëm i borxhit publik.
“Për Ministrinë e Financave mbetet i palëkundur angazhimi për të ruajtur stabilitetin ekonomik dhe për nxitjen e një rritjeje që sjell përfitime për të gjithë qytetarët”, tha Malaj.
