Banorët e disa fshatrave të njësisë administrative Cakran po përballen me vështirësi të mëdha për shkak të gjendjes së rënduar të një segmenti rrugor prej rreth 2 kilometrash, që i lidh me autostradën Levan – Tepelenë. Rruga, e lënë në harresë dhe e paasfaltuar, gjatë stinës së reshjeve bëhet pothuajse e pakalueshme, duke u kthyer në një problem serioz për afro 1000 banorë të zonës.
“Kemi tokat poshtë dhe nuk shkojmë dot! Mezi ecim në këmbë, makinat e vogla nuk futen këtu, vetëm fuoristradat,” shprehen të shqetësuar banorët. Një prej tyre, i kthyer nga emigrimi, thotë se një situatë të tillë nuk e ka parë askund dhe se për të dalë në autostradë, janë të detyruar të ndjekin një itinerar më të gjatë prej 10 kilometrash, pasi rruga e fshatit është e pakalueshme për shkak të gropave dhe baltës.
Banorët e Gorishovës i bëjnë apel Bashkisë së Fierit për ndërhyrje të menjëhershme, por sipas burimeve nga ky institucion, ky segment rrugor nuk është pjesë e investimeve të buxhetit për këtë vit.
