Një tjetër bilanc negativ është shënuar që në orët e para të ditës, ku si pasojë e një aksidenti, janë plagosur burrë e grua. Çifti, fatmirësisht është jashtë rrezikut për jetën. Ata ndodhen në spital, nën kujdesin e bluzave të bardha.
Burimet zyrtare të uniformave blu bëjnë me dije se aksidenti ka ndodhur në aksin rrugor Elbasan-Peqin, ku shtetasi me inicialet K.H., 31-vjeç, ka humbur kontrollin e mjetit tip “Ford”, dhe është përplasur me murin e një lokali në anë të rrugës. Të lënduar mbetën shtetasit S.H., 33-vjeç, si dhe bashkëshortja e tij, shtetasja F. H., 39-vjeçe.
Informacion paraprak
Në aksin rrugor Elbasan-Peqin, në fshatin Broshkë, Elbasan, shtetasi K.H, 31-vjeç, banues në fshatin Bishqem, Peqin, duke drejtuar mjeti tip “Ford”, me targa AA 567 TU, ka humbur kontrollin e mjetit dhe është përplasur me murin e një lokali, që ishte në anë të rrugës.
Si pasojë e këtij aksidenti janë aksidentuar shtetasit S.H., 33-vjeç, banues në fshatin Bishqem, si dhe bashkëshortja e tij shtetasja F. H.,39-vjeçe, të cilët ndodhen në spitalin e Elbasanit, nën kujdesin e mjekëve, jashtë rrezikut për jetën. Grupi hetimor ndodhet në vendngjarje dhe po punon për zbardhjen e shkakut të aksidentit.
