Xhudistja Majlinda Kelmendi u ka dhënë një mesazh të gjithë sportistëve shqiptarë. E ftuar në emisionin “Histori Suksesi” në RTV Dukagjini, ajo ka folur për oferta marramendëse.
Kampionia e botës tha se ka pasur oferta të majme nga shtete të ndryshme.
“Ishim në një takim bashkë me Tonin (Driton Kuka), kur rastësisht takuam përfaqësuesit e asaj federate. Kur mora vesh shumën, mbeta e shtangur”, tha Kelmendi.
Ajo shtoi se nuk është penduar që e ka refuzuar atë ofertë.
“Nuk do ta kisha pranuar ofertën edhe nëse do ta dija shumën që do të përfitoja. Respekti që e merr në vendin tënd nuk besoj se e merr diku tjetër”.
Majlinda ka thënë se nuk mban mend ndonjë pritje që i ka bërë përshtypje nga liderët institucional, por në mendje i ka mbetur pritja që asaj i është bërë nga qytetarët e Kosovës, kur ka parakaluar nëpër Prishtinë me autobusë, pasi ishte shpallur kampione.
Sportistja ka thënë se nuk ka as Facebook as Instagram dhe nuk ndjek as lajmet në televizion.
“Ngjarjet e rëndësishme që ndodhin në Kosovë unë i kuptoj ndoshta pas një jave”.
