Diva e muzikës botërore, Madonna ka folur për herë të parë sa i përket arsyes që ajo zgjodhi pikërisht Portugalinë për të jetuar një vit më parë. Ajo bashkë me 4 nga 6 fëmijët me të cilët jeton, David Banda dhe Mercy James, 12 vjeç dhe binjaket Stella dhe Esther, 5 vjeç tashmë jetojnë në Lisbonë.
Në një intervistë për “Vogue Italia”, këngëtarja e famshme sqaron se kjo ka qenë zgjedhje për të ndjekur ëndrrën e djalit të saj, Davidit, për tu bërë një futbollist profesionist. Madonna tregon se kishte mundësi të zgjidhte Torinon dhe Barcelonën për të jetuar, po në fund ishte kjo dëshira e fëmijëve të saj dhe ashtu u vendos.
“Djali im David, që më 24 shtator do të jetë 13 vjeç, kërkon të luajë futboll në nivelet më të larta. Bëra të pamundur për t’i gjetur shkollat më të mira të futbollit me trajnerët më të mirë, por SHBA në këtë aspekt është prapa pjesës tjetër të botës. E shihja të mërzitur dhe mendova se kishte ardhur momenti i duhur për të bërë një ndryshim në jetën tonë, duke e sjellë te Benfica,” – tregon ajo.
“I thashë vetes: të shoh nëse për një vit arrij të jetoj në një ambient ndryshe nga më parë dhe t’i çojë katër fëmijët e mi në një vend me kulturë ndryshe, ku mund të rriten shumë mirë. Kisha katër zgjidhje, Juventus Academy në Torino, Barcelona dhe Benfica ose Sportingu i Lisbonës. Sigurisht që Barcelona është një qytet fantastik dhe Torino më pëlqen shumë, por nuk më dukej e përshtatshme për fëmijët e tjerë që nuk merren me sport. Nuk mund të mendoj vetëm për David. Më pas zgjodha Lisbonën që i pëlqen të gjithëve.”
