Inspektorati Kombëtar i Mbrojtjes së Territorit ka nisur mëngjesin e kësaj të shtune një aksion për shembjen disa objekteve në zonën e Radhimës dhe Orikumit.
Në fokus të ndërhyrjes janë njësi shërbimi, bare dhe beach bare, të cilat, ndonëse kishin marrë leje për ushtrimin e aktivitetit disa muaj më parë, ndodhen në trasenë ku do të zgjerohet projekti “Lungomare 3” në Vlorë.
Objektet po prishen për të hapur rrugën e zbatimit të projektit infrastrukturor, duke liruar hapësirat që pengonin vijimin e punimeve.
Kjo ndërhyrje vjen pas shembjeve të ngjashme të kryera ditët e fundit në Dhërmi dhe Jalë, ku IKMT ndërhyri për lirimin e hapësirave të zëna në mënyrë të paligjshme ose që binin ndesh me projektet zhvillimore në vijim.
Sipas burimeve zyrtare, aksioni i IKMT-së do të vijojë edhe në ditët në vijim, si pjesë e zhvillimit urban dhe turistik të bregdetit jugor.
