Kryetari i Partisë Demokratike, Lulzim Basha ka dalë sot në një konferencë me gazetarët ku u ndal te raporti i DASH, ku evidentohen disa problematika për Shqipërinë.
Ai tha se një nga problemet madhore të kësaj qeverie është korrupsioni.
“Raporti i DASH i cili konfirmon atë që shqiptarët e dinë dhe prekin çdo ditë, që korrupsioni është problemi më i madh kësaj qeverie dhe vendit. Kjo lidhet me krizën ekonomike dhe koston e jetesës.
Korrupsioni ushqehet çdo ditë nga qeveria e Ramës përmes skemave që sa vijnë e sofistikohen. Në qendër të piramidës është Ram se nuk mund të ketë një qeverisje kaq të korruptuar dhe në krye të jetë një kryeministër i ndershëm.
Kjo konfirmon luftën ndaj korrupsionit si prioritet kombëtar.
SPAK lindi si nevojë për të luftuar nivelin gjigand të korrupsionit.
Ndaj përsëris thirrjen për çdo faktor politik, të forcojmë një fron të përbashkët me të gjithë njerëzit e ndershëm të këtij vendi.
Vlerësoj punën e jashtëzakonshme nga OJQ dhe i bëj thirrje atyre dhe donatorëve të huaj të mos reshtin përpjekjet.
PD do të dorëzojë në Kuvend amendamente për të mbështetur SPAK me misionin që ka marrë përsipër”, tha ai.
Basha u shpreh kundër lëvizjes së kreut të grupit parlamentar të PD-së, Gazment Bardhi për të çuar sërish në Kushtetuese mandatin e Olta Xhaçkës. I pyetur se nëse po i ikin deputetët, meqë mes deputetëve që kanë firmosur janë dhe disa deputetë që e përkrahin, Basha u përgjigj:
” As nuk kemi ndaluar dhe as nuk kemi lejuar askënd. Është bindja totale e PD se kthimi në gjykatë Kushtetuese është një tjetër lehtësim që i bëhet Edi Ramës në një akt të paprecedentë në 30 vite. Gjykata Kushtetuese ka folur. Kur flet Kushtetuesja, bindet Parlamenti. Askush nuk është mbi Gjykatën Kushtetuese, përveç Gjykatës Europiane të të Drejtave të Njeriut. Po pastaj ku do e çosh? Te daje Ceni? Ça do të thotë Kushtuesja? Apo bëjmë sikur! I ka zënë paniku pushtetarët shqiptarë nga SPAK. Por që në këto akte të jetë bashkëpunëtore një pjesë e opozitës, tregon krizën që ka kjo pjesë. I bëj thirrje mos fusni kokën në rërë si struci, mos bëni për budallenj shqiptarët dhe demokratët, hiqni dorë nga skemat boshe.
Ta çosh në Kushtetuese do të thotë të bësh Duanë e Ramës”- u shpreh Basha.
