Nënkryetari i Partisë Demokratike, Luçiano Boçi ka folur mbi përgatitjet për zgjedhjet parlamentare të 11 majit, duke theksuar prurjet e reja në listat e kandidatëve dhe zgjerimin e koalicionit të PD-së. Boçi u shpreh se për herë të parë është respektuar një përqindje e caktuar për përfaqësuesit e forumit rinor, duke sjellë elementë të rinj në skenën politike.
Ai nënvizoi gjithashtu përfshirjen e figurave nga grupe të ndryshme interesi dhe një përfaqësim më të balancuar territorial.
“PD ka ndërtuar një koalicion të gjerë duke u bazuar në matematikën e votës, një faktor kyç për fitoren e zgjedhjeve. Surprizë në këto lista kandidatësh është futja e elementeve të rinj. Përfaqësuesit e forumit rinor kanë përqindjet e tyre të caktuara që respektohen për herë të parë. Kemi edhe figura të reja që vijnë nga grupe të ndryshme interesi. Ajo që është e re është kombinimi i territorit që ka sjellë në përfaqësim PD-ja. Është edhe ndërtimi i bazës së koalicionit shumë të gjerë të PD, në raport me matematikën e votës”, tha ai.
