Lëvizja Socialiste për Integrim ka përjashtuar dy këshilltarët e partisë së saj që i dhanë votat Veliajt për rritjen e çmimit të ujit.
Dy këshilltarët e përjashtuar janë Genta Mezini dhe Agim Kraja.
Koordinatorja e LSI-së Erjona Bixha doli para mediave ku akuzoi dy këshilltarët se kanë votuar për interesa korruptive duke shkelur statutin e LSI-së.
“Në koherencë të plotë me qëndrimin politik të LSI-së vendosim të përjashtojmë nga grupi i këshilltarëve bashkiakë Genta Mezinin dhe Agim Krajën për shkelje të statutit. Qëndrimi dhe votimi i tyre dje në Këshillin Bashkiak ka qenë individual dhe korruptiv dhe jo në emër të partisë dhe në shërbim të qytetarëve. Grupi i këshilltarëve të LSI duke u diskutuar qartë vendosi që emrat e Mezinit dhe Krajas, t’u propozohen forumeve që në zbatim të statusit të përshkallëzojnë masën ndëshkuese të këtyre këshilltareve që keqpërdorën atributet e LSI, duke trafikuar votën dhe duke tradhtuar besimin e qytetarëve. Duke e konsideruar opozitën mision në shërbim të vendit, atë çështje morale, garanton qytetarëve e Tiranës se detyrim i yni është respektimi i të drejtave të tyre”, tha Bixha.
Agim Kraja, ish-këshilltar i Lëvizjes së Legalitetit deklaroi votën e tij në Këshilli kur theksoi se investimet në ujësjellës ishin të domosdoshme. Ndërkohë, Genta Mezini mori pjesë në këtë mbledhje për herë të parë, pasi zuri vendin e kryetares së LRI, Floida Kërpacit e cila u zgjodh deputete në zgjedhjet parlamentare të 25 qershorit.
