Sevin Serjani
Zhvillimet e fundit politike kanë çorientuar së tepërmi opinionin publik. Analistët janë rreshtuar në llogoret e atyre që ushqehen. Ndonëse situata politike jep avantazhe për të bërë konspiracione në dobi të faktorëve politikë, për të dhënë një orientim duhet një analizë më shumë politike, sesa një analizë konsipirative. Le të analizojmë të tria rrymat.
Në kampin opozitar kemi një Çadër, e cila u kthye në simbol të një rezistence të munguar nga opozita, çka deri në 17 shkurt ishte inekzistente. Kemi faktorin LSI, dhe së fundmi PDIU, të cilët aktualisht kanë kaluar në mbrojtje, duke lënë lojën e hapur për dy partitë e mëdha. Ky veprim i LSI-së ka shformësuar mandatet kokëfortë në Parlament dhe ka hapur mundësinë për një balancim forcash. Ndërsa, në kampin tjetër, Rilindja e konsoliduar me pushtet, kërkon ta vendosë këtë pushtet në shërbim të fitores së 18 qeshorit.
LSI e PDIU kërkon të mbajë në pushtet Ramën, i cili në këto momente do të preferonte të merrte rolin e opozitës, duke lëshuar terren jo për qeveri teknike, por për t’i dhënë shkas dakordësisë së votave PD + (aleatë) dhe LSI e PDIU, çka do t’i jepte mundësi PS-së të hynte në zgjedhje me gojën plot si “opozitë”, duke mos mbajtur përgjegjësitë e mandatit 4-vjeçar të qeverisjes. Vetëm kështu mund të lexohet edhe emërimi i Xhafajt si ministër i Brendshëm, apo kokëfortësisë për mungesë dialogu.
Nëse LSI do qëndronte midis dy zjarreve, atëherë ajo mund të mblidhte kostot e qeverisjes së Rilindjes, ndaj shpjegohet kalimi në mbrojtje i Metës me deklaratën nga selia e LSI-së.
Ndërsa PD e rizgjuar tashmë ka hapur zjarr në dy drejtime, në atë të një qeverie teknike, e cila nga situata socio-politike i jep të drejtën legjitime për kërkesën e saj për qeveri teknike, dhe nga ana tjetër, ajo ka nisur vrullshëm edhe fushatën me moton ‘‘Republika e Re’’. Ndaj çdo lëvizje politike në vazhdimësi është vetëm për një qëllim, të arrihet konsesusi për qeveri teknike, me Rilindjen si pozitë, me Republikën e Re si opozitë dhe me LSI-në e PDIU-në si pol të tretë. Pra, ky mund të jetë edhe formatimi i llogoreve të koalicioneve parazgjedhore.
